關於政改，我有少少嘢想講

我真心覺得宜家已經係香港開埠以來最民主嘅時侯喇。泛民班友為咗自身利益，不惜犧牲香港嘅繁榮穩定同我哋嘅未來，為反對而反對，極力阻止政改方案喺立法會通過。我想問，政改方案唔通過，社會繼續撕裂落去，直到最終支離破碎，咁對香港有咩好處？
   我只係一個朝九晚五嘅女人仔，净係我自己做嘢嗰間貿易公司，我都feel到政治爭拗帶俾我哋嘅壞處。舊年11月到宜家，公司嘅業績持續下滑。大家都話，香港無咗關稅優勢，進出口貿易愈嚟愈少，競爭就愈嚟愈大，生意愈嚟愈難做。我老闆為咗減低成本，裁員咗幾次。好彩，我都算係十幾年嘅老臣子，先至未被炒魷鱼，但都係每日提心吊膽，驚下個轮到我。
    或者有人會鬧我係左膠、五毛。坦白講，我老公係警察，我亦都撐警察。自舊年以嚟，泛民不斷搞事，我睇到我老公嘅工作量有增無減，甚至有假冇得放。特別係佔中嗰排，D人衝擊政府，我嗰陣真係好擔心，我知道我老公D同事仲受咗傷。我老公話，警察要政治中立，保持克制，但佢都仲係被鬧話係叛徒、警犬，甚至有D親戚朋友私底下都咁講。我知道佢都好大壓力。我覺得，作為公務員，佢並冇錯囉，錯嘅係攻擊佢哋嘅人。大家都係土生土長嘅香港人，我唔希望香港毀喺少數人嘅手上。我支持我老公，我選擇挺身而出，雖然擔心，但我亦都支持佢企出黎，捍衛呢個城市嘅核心價值，向暴力同非法say no。
    最令我心痛嘅係我個仔，舊年因為參加佔中，同我老公吵咗好多次。見到佢哋咁，我好心痛。我同我老公都好努力做嘢，只係為咗比個仔舒服嘅生活條件，等佢可以專心讀書，出人頭地。但自從佢搞社運，唔單止成績差了好多，仲同我哋嘅關係差咗好多。我净係擔心，如果佢係出边發生咗乜事，咁佢以後仲點搵工，仲有前途咩？作為一位母親，我只係希望我嘅小朋友可以平平安安，畢業後可以搵到一份好啲嘅工作，諗到呢度我真係好心痛，好想喊，唉~~
宜家，我仲要擔心埋我父母。佢哋退休後學人玩下股票，舊年股市好，就話冇乜嘢。近期我係網上不時睇到「國內投資者擔心政改否決令股市暴跌」嘅傳聞。連報紙上黃英豪都話，政改方案遭否決，股市會大跌。甚至連曾俊華都講乜經濟同政治關係密不可分，話唔能排除股市下挫可能性。我惊佢地將積蓄全部摆哂喺股票度，最尾万一股災出現，咩都冇哂咁点算。
琴日，連我喺旺角開鋪頭嘅家姐都好激動咁同我講舊年10月以黎「政改」帶俾佢嘅痛苦。佢話，以前鋪頭D生意都好OK，自由行多到做唔切。但係，佔中之後，佢鋪頭D生意縮水四成，佢話D內地遊客話去香港唔安全，惊人身冇保障。佢仲鬧爆，呢幾個月逢周未都有班「舉牌友」遊街，衰過黑社會。班友好似唔使讀書唔使做嘢咁。WHAT THE FXXK! 咁搞法，香港仲點會有法治呢，我想問?
我唔希望政治紛爭打亂屋企嘅平常生活。我唔理政改最終結果係點，我净係希望屋企和諧，老公平平安安，個仔順利畢業，搵份好工，父母晚年無憂。我覺得政改爭拗無日無之真係好煩，我好希望以後電視睇到嘅唔再係政治辯論，NO NEWS IS GOOD NEWS。