星二代BB聯盟　少爺占冧囝　王浩信俾囡壓

嚟緊又係一年一度嘅父親節及母親節，相信好多仔女都開始絞盡腦汁，花心思點樣畀驚喜父母。今日就同大家分享下幾位藝人及模特兒父母，點樣從仔女身上得到快樂，希望大家從中得到父母親節禮物靈感？

第一位係前二人女子組合2R成員黃婉君（Rosanne），眨下眼佢經已係3歲大嘅Dylan同9個月大嘅Daniel嘅媽咪，呢位靚媽咪完全享受做兩位「D先生」背後嘅女人。之前復活節假，藉有陽光燦爛的日子，佢就帶咗佢哋去淺水灣玩沙，剛剛過咗呢個周末，就去到馬灣嘅挪亞方舟度玩，佢仲上載揹住Daniel相片留言「好愉快的周未﹗你呢？」

第二位係啱啱喺今個19號，榮升為爸爸嘅少爺占，十日大嘅BB仔甄和天（Timmy），經已係少爺占眼中嘅一切，初為人父梗係乜都要學啦﹗呢位平時喺幕前嬉皮笑臉嘅少爺占，喺過去十日，就變成一位勤力好學嘅爸爸，佢前晚喺微博分享同囝囝四目交投相片，留言：「學習和練習，這是生命的一種習作。」

另一位係前日剛做咗爸爸兩年嘅王浩信，佢喺微博上載咗跟愛女王靖喬慶祝兩歲生日相片，蛋糕上寫上「QQ Happy Birthday」，靖喬仲好鬼Sweet咁用手指餵Daddy食蛋糕，兩父女又糖黐豆咁頭貼頭影相自拍，玩到攰時，靖喬索性當Daddy嗰頭，係枕頭咁瞓，究竟有幾舒服？睇下佢瞓到流埋口水就知﹗

除咗少爺占､Rosanne同王浩信晒仔女照外，商台DJ朱薰､陳浩民太太､李小璐及Cara G.等，都喺微博晒溫情。朱薰貼咗光頭B摔角造型，相當可愛，朱薰留言話：「光頭摔角手，這陣子我有很多挑戰要面對，你那麼多肌肉，請賜我賜我賜我力量力量力量。」

而陳浩民太太Lisa就貼咗一組仔女玩樂照，姊弟情深喎，佢話：「清晨就被你們倆甜翻@Elizabeth雅薷@Cyrus923每天見證你們倆感情越來越深厚，越來越愛互動，由衷希望你們就這樣相互幫助、相互扶持一輩子。」

李小璐就貼咗張老公賈乃亮與囡囡照片，並留言：「周末好開心啊，爸爸帶我和媽媽逛街了。」混血模CARA G.就繼續貼抱B女照，有女萬事足喎﹗

[img]http://static.apple.nextmedia.com/images/apple-photos/video/20140429/org/1398716107_9f70.jpg[/img]

來源:蘋果日報網站