華仔錯踢人哋碌棍　敗訴賠69萬

劉德華17年前拍咗部電影《黑金》（台譯《情義之西西里島》)，有場直升機打鬥戲份，華仔不慎踢到操縱桿導致直升機傾斜，直升機葉片掃到大光燈布幔而受損，當時出租直升機嘅台灣德安航空要求賠償不果，98年入稟台北法院要求賠償，一告就10年，08年判咗華仔賠償510萬新台幣（約133萬港幣），之後提出上訴，又過咗6年，前後搞咗16年，噚日終於有定案，台灣高院駁回上訴，話雖然德安航空有責任喺拍攝時確保航務安全，但華仔誤觸操縱桿都要負4成過失責任，判佢賠償267萬新台幣（約69萬港元）。

[img]http://static.apple.nextmedia.com/images/apple-photos/apple/20140122/large/22ec7p2.jpg[/img]
■向太噚日喺電話度話對判決好失望。資料圖片

[b]唔使華仔畀錢[/b]
中國星老闆向華強太太陳嵐得悉判決，噚日喺電話回應：「好失望同唔合理，租直升機、機師同所有嘢都係直升機公司安排，有乜事就電影公司負所有責任，要劉德華賠償唔合理，中國星會負責到底，唔會要劉德華付一分錢，佢只係演員，雖然唔可以再上訴，會用其他方法抗爭到底，爭取公義，相信台灣法律係公正。」華仔方面就話要問番中國星嗰邊回應。
另外，華仔同湯唯將合作新片《失孤》，相信係劇組喺網絡徵求演員而走漏風聲，其中面試演員嘅要求係15到20歲生得似劉德華嘅人，嚟緊將會有好多山寨版劉德華曝光。



來源:蘋果日報網站